Baldvin Oddsson hóf trompetnám við Tónskóla Sigursveins fimm ára gamall og lauk þaðan framhalds-og burtfararprófi með tónleikum í Seltjarnarneskirkju 10 árum síðar. Baldvin hefur síðan verið við tónlistanám í Bandaríkjunum, fyrst við Interlochen Arts Academy í Michigan, síðan við San Francisco Conservatory of Music í samnefndri borg og loks hjá Stephen Burns í Chicago. Í haust heldur hann námi sínu áfram þar vestra, nú við Manhattan School of Music í New York. Við Interlochen bar Baldvin sigur af hólmi í einleikarakeppni skólans og lék í kjölfarið einleik með hljómsveit skólans.

Baldvin hefur tvívegis sótt sumarnámskeið við Tónlistarhátíðina í Brevard, Norður Karólínu og einnig í tvígang við Center for Advanced Musical Studies í Chosen Vale, New Hampshire. Þá hefur Baldvin einnig tekið þátt í The National Brass Symposium sem haldið er í Atlanta-borg en þar koma reglulega saman margir helstu málmblásarar Bandaríkjanna.

Sumarið 2008 sótti Baldvin 33. alþjóðlegu trompethátíðina sem haldin var í Banff í Kanada og spilaði m.a. fyrir Frits Damrow, fyrsta trompetleikara Concertgebow hljómsveitarinnar í Amsterdam. Í kjölfarið hefur Baldvin tvívegis þegið heimboð Frits og sótt til hans nokkra spilatíma.

Haustið 2009 frumflutti Baldvin trompetkonsert eftir Oliver Kenntish, sem tónskáldið tileinkar honum, með Sinfóníuhljómsveit áhugamanna og hafði áður leikið einleik með sveitinni á jólatónleikum hennar 2007. Baldvin lék einleik með Sinfóníuhljómsveit Íslands á jólatónleikum hljómsveitarinnar í desember 2008 og með Sinfóníuhljómsveit Tónlistarskólanna í janúar 2010. Þá leiddi hann trompetdeild nýstofnaðrar Ungsveitar Sinfóníuhljómsveitar Íslands á fyrstu tónleikum hennar í september 2009 og var í baksviðssveit Sinfóníuhljómsveitar Íslands á 60 ára hátíðartónleikum hennar vorið 2010.

Síðla árs 2010 var Baldvini boðið að koma fram í útvarpsþættinum From the Top á vegum The National Public Radio í Bandaríkjunum. Er þátturinn sendur út á um 250 útvarpsstöðvum víðs vegar um Bandaríkin. Talið er að allt að sjöhundruð og fimmtíu þúsund manns hlýði reglulega á þáttinn þar ytra en megið stef hans eru ungir og efnilegir tónlistarmenn á sviði sígildrar tónlistar. Við sama tækifæri hlaut Baldvin The Jack Kent Cooke Young Artist Award og veglegan styrk til hljóðfærakaupa og fjármögnunar þátttöku í sumarnámskeiðum sumarið 2011.

Baldvin Oddsson

trompet | trumpet